వరుసగా 5 ప్లాపులు.. అయినా డైరెక్టర్‌గా ఆకలి తీరలేదా?

టాలీవుడ్‌లో ఒకప్పుడు ఎమ్మెస్ రాజు (MS Raju) అంటే ఒక బ్రాండ్. ఆయన పేరు పోస్టర్ మీద పడిందంటే అది బ్లాక్ బస్టర్ హిట్టే. ‘ఒక్కడు’, ‘వర్షం’, ‘నువ్వొస్తానంటే నేనొద్దంటానా’.. ఇలా వరుస ఇండస్ట్రీ హిట్స్ ఇచ్చి టాలీవుడ్‌లో ‘సంక్రాంతి రాజు’గా వెలుగొందిన అగ్ర నిర్మాత ఆయన. కేవలం డబ్బులు పెట్టే నిర్మాతగానే కాకుండా, తన సినిమాల కథ, సంగీతం, మేకింగ్ లో ఆయన వేలు పెట్టని విభాగం ఉండేది కాదు. బహుశా ఆ అనుభవమే ఆయన్ను దర్శకుడి కుర్చీ వైపు నడిపించిందేమో. కానీ, ప్రొడ్యూసర్‌గా ఆయన చూసిన సక్సెస్ రేట్, డైరెక్టర్‌గా ఆయనకు దక్కలేదు. అయినా సరే వెనకడుగు వేయకుండా, ఇప్పుడు తన ఆరో సినిమా ‘అగాధ’ (Agadha) తో ప్రేక్షకులను పలకరించడానికి వస్తున్నారు.

అసలు ఐదు ప్లాపులు చూసిన తర్వాత కూడా, మళ్లీ మెగాఫోన్ పట్టుకోవడానికి ఎమ్మెస్ రాజు గారికి ఉన్న ఆ ధైర్యం ఏంటి? డైరెక్టర్‌గా హిట్ కొట్టాలనే ఆ ‘కసి’ వెనుక ఉన్న కారణాలు ఏంటి?

డైరెక్టర్‌గా పరాజయాల ప్రయాణం: 2008లో కన్నడ బ్లాక్ బస్టర్ ‘ముంగారు మళై’ని తెలుగులో ‘వాన’ (Vaana) గా రీమేక్ చేసి డైరెక్టర్‌గా మారారు ఎమ్మెస్ రాజు. ఆ సినిమా మ్యూజికల్‌గా హిట్టయినా బాక్సాఫీస్ వద్ద నిరాశపరిచింది. ఆ తర్వాత తన కొడుకు సుమంత్ అశ్విన్‌ను హీరోగా పరిచయం చేస్తూ 2012లో ‘తూనీగ తూనీగ’ తీశారు. అది కూడా వర్కౌట్ కాలేదు. ఆ తర్వాత పూర్తిగా రూటు మార్చి 2020లో ‘డర్టీ హరి’ లాంటి బోల్డ్ అడల్ట్ కంటెంట్ తో వచ్చారు, 2022లో ‘7 డేస్ 6 నైట్స్’ అంటూ యూత్‌ఫుల్ మూవీ చేశారు. ఇక గత ఏడాది నరేష్-పవిత్ర లోకేష్ ల రియల్ లైఫ్ ఆధారంగా ‘మళ్లీ పెళ్లి’ అనే కాంట్రవర్షియల్ సినిమా తీశారు. ఇలా డైరెక్టర్‌గా తీసిన ఐదు సినిమాలు కమర్షియల్‌గా ఆయనకు సక్సెస్ ఇవ్వలేకపోయాయి.

ఆ ధైర్యం ఏంటి? ఆ కసి ఏంటి? వరుసగా ఐదు సినిమాలు ప్లాప్ అయితే ఏ దర్శకుడైనా డిప్రెషన్ లోకి వెళ్లిపోతాడు. లేదా సినిమాలు మానేస్తాడు. కానీ ఎమ్మెస్ రాజు గారి వయసు పెరుగుతున్నా, ఆయన ఆలోచనలు మాత్రం కుర్రాడిలా అప్‌డేట్ అవుతూనే ఉన్నాయి. ఆయనలోని ఆ ధైర్యానికి కారణం.. సినిమాపై ఆయనకున్న పిచ్చి ప్రేమ. తాను కేవలం నిర్మాతగా, డబ్బులు పెట్టే వ్యక్తిగా మాత్రమే మిగిలిపోకూడదు.. ఒక కథకు ప్రాణం పోసే క్రియేటర్‌గా, డైరెక్టర్‌గా తనకంటూ ఒక మార్క్ క్రియేట్ చేసుకోవాలనే ఆకలి ఆయనలో బలంగా ఉంది. ఒకప్పుడు తన జడ్జిమెంట్‌తో ఇండస్ట్రీ హిట్స్ ఇచ్చిన ట్రాక్ రికార్డ్ ఆయనది. ఆ జడ్జిమెంట్ డైరెక్టర్‌గా ఎందుకు వర్కౌట్ అవ్వట్లేదు అని తనను తాను నిరూపించుకునే ప్రయత్నమే ఈ కసికి కారణం.

ఇప్పుడు ‘అగాధ’తో సరికొత్త ప్రయోగం: ఫ్యామిలీ, లవ్, బోల్డ్, కాంట్రవర్సీ.. ఇలా అన్ని జానర్స్ ట్రై చేసిన రాజు గారు, ఇప్పుడు ఏకంగా డార్క్ మిస్టికల్ థ్రిల్లర్ జానర్‌లోకి అడుగుపెట్టారు. ఆయన డైరెక్షన్‌లో వస్తున్న 6వ సినిమా ‘అగాధ’ (Agadha) ఫస్ట్ లుక్ పోస్టర్ ఇప్పుడు సోషల్ మీడియాలో ట్రెండ్ అవుతోంది.

“ఒక చీకటి శక్తి.. ఒక నిగూఢమైన నిజం.. రక్తం మరియు నమ్మకంతో పుట్టిన ఒక ప్రతికారం (A Dark Force.. A Forbidden Truth… A Reckoning born in Blood & Belief)” అంటూ ఆయన షేర్ చేసిన ఈ పోస్టర్ గూస్‌బంప్స్ తెప్పిస్తోంది. పోస్టర్‌లో ఒక అమ్మాయి చీకటి గుహలో నిలబడి ఉండగా, ఎదురుగా నిప్పుల వెలుగులో ఒక భయంకరమైన దేవత విగ్రహం కనిపిస్తోంది. ఇది చూస్తుంటే ఈసారి ఎమ్మెస్ రాజు గారు ఏదో గట్టిగానే ప్లాన్ చేసినట్లు అర్థమవుతోంది.

ఐదు పరాజయాలు ఆయనకు నేర్పిన పాఠాలు.. ‘అగాధ’ రూపంలో ఆయనకు ఆశించిన ‘బ్లాక్ బస్టర్ హిట్’ ను డైరెక్టర్‌గా ఇస్తుందేమో వేచి చూడాలి. ఏదేమైనా ఆ వయసులో కూడా కొత్తగా ఆలోచిస్తూ సినిమాలు చేస్తున్న ఆయన ప్యాషన్‌కు సెల్యూట్ చేయాల్సిందే!MS రాజు గారి ఈ పట్టుదల చూస్తే మీకు ఏమనిపిస్తుంది కామెంట్స్ లో మాతో పంచుకోండి.