విషాదంలో భారతీయ సినీ లోకం.. లెజెండరీ సింగర్ ఆశా భోంస్లే కన్నుమూత!

భారతీయ చలనచిత్ర సంగీత చరిత్రలో ఒక సువర్ణాధ్యాయం ముగిసింది. ఎనిమిది దశాబ్దాల పాటు తన మధురమైన గాత్రంతో యావత్ దేశాన్ని ఉర్రూతలూగించిన లెజెండరీ సింగర్, పద్మ విభూషణ్ ఆశా భోంస్లే (Asha Bhosle) గారు ఇవాళ (ఏప్రిల్ 12, 2026) ముంబైలోని బ్రీచ్ క్యాండీ ఆసుపత్రిలో తుదిశ్వాస విడిచారు. 92 ఏళ్ల వయసులో తీవ్రమైన అలసట, ఛాతీ ఇన్ఫెక్షన్ మరియు శ్వాసకోశ సమస్యలతో ఆసుపత్రిలో చేరిన ఆమె.. చికిత్స పొందుతూ మల్టీ-ఆర్గాన్ ఫెయిల్యూర్ కారణంగా కన్నుమూశారు. సోమవారం ముంబైలోని శివాజీ పార్క్‌లో ప్రభుత్వ లాంఛనాలతో ఆమె అంత్యక్రియలు జరగనున్నాయి. ఆమె మరణవార్తతో యావత్ సినీ మరియు సంగీత లోకం తీవ్ర దిగ్భ్రాంతికి గురైంది.

బాల్యం, కుటుంబ నేపథ్యం: ఆశా భోంస్లే 1933 సెప్టెంబర్ 8న మహారాష్ట్రలోని సాంగ్లీలో జన్మించారు. ఆమె తండ్రి పండిట్ దీనానాథ్ మంగేష్కర్ ప్రముఖ శాస్త్రీయ సంగీత విద్వాంసుడు. ప్రఖ్యాత గాయని, భారతరత్న లేట్ ‘లతా మంగేష్కర్’ గారికి ఆశా స్వయానా చెల్లెలు. 9 ఏళ్ల వయసున్నప్పుడే తండ్రి చనిపోవడంతో, చిన్న వయసులోనే తన అక్క లతాతో కలిసి పాడటం ప్రారంభించారు. 1943లో మరాఠీ చిత్రం ‘మాఝా బాల్’ లో కేవలం 10 ఏళ్ల వయసులో ఆశా తన సింగింగ్ కెరీర్ ప్రారంభించారు.

పోరాటం నుంచి శిఖరాగ్రం వరకు: కెరీర్ ప్రారంభంలో ఆశాకు అంత సులభంగా అవకాశాలు రాలేదు. అప్పటికే లతా మంగేష్కర్, గీతా దత్ లాంటి వారి హవా నడుస్తుండటంతో.. వాళ్లు వదిలేసిన పాటలు, సెకండ్ గ్రేడ్ సినిమాలు, లేదా క్యాబరే డాన్సులకు మాత్రమే ఆమెకు అవకాశాలు వచ్చేవి. అయితే, 1957లో వచ్చిన ‘నయా దౌర్’ సినిమా ఆమె కెరీర్‌ను మలుపు తిప్పింది. ఆ తర్వాత ప్రఖ్యాత సంగీత దర్శకుడు ఆర్.డి. బర్మన్ తో ఆమె కాంబినేషన్ హిందీ సినిమా సంగీతాన్ని కొత్త పుంతలు తొక్కించింది.

“పియా తూ అబ్ తో ఆజా”, “యే మేరా దిల్”, “ఆజా ఆజా” లాంటి ఫాస్ట్ బీట్ పాటలతో పాటు.. ‘ఉమ్రావ్ జాన్’ సినిమాలో గజల్స్ పాడి తన గాత్రంలో ఉన్న క్లాసికల్ డెప్త్‌ను నిరూపించుకున్నారు. సౌత్ ఇండియాలో ఇళయరాజా, ఏ.ఆర్. రెహమాన్ లాంటి దిగ్గజాల సంగీతంలో తెలుగు, తమిళ భాషల్లో కూడా ఎన్నో సూపర్ హిట్ పాటలు పాడారు.

ఎప్పటికీ నిలిచిపోయే రికార్డులు:

• గిన్నిస్ రికార్డ్: సంగీత చరిత్రలో అత్యధిక స్టూడియో రికార్డింగ్స్ చేసిన గాయనిగా (Most recorded artist) 2011లో గిన్నిస్ వరల్డ్ రికార్డ్స్ లో చోటు దక్కించుకున్నారు. ఆమె 20కి పైగా భాషల్లో సుమారు 12,500లకు పైగా పాటలు పాడారు.
• పద్మ విభూషణ్: భారత ప్రభుత్వం ఆమెను 2008లో దేశ రెండవ అత్యున్నత పౌర పురస్కారం ‘పద్మ విభూషణ్’ తో సత్కరించింది.
• దాదాసాహెబ్ ఫాల్కే అవార్డు: 2000 సంవత్సరంలో భారతీయ సినిమా అత్యున్నత పురస్కారం అందుకున్నారు. అలాగే రెండు జాతీయ అవార్డులు, ఇంటర్నేషనల్ గ్రామీ (Grammy) నామినేషన్లు దక్కించుకున్నారు.

ఎనిమిది దశాబ్దాల పాటు తన వాయిస్ తో ఎన్నో తరాల ప్రేక్షకులను మెప్పించిన ఆశా భోంస్లే భౌతికంగా మన మధ్య లేకపోయినా.. ఆమె పాడిన పాటలు ఎప్పటికీ బతికే ఉంటాయి. ఆశా జీ ఆత్మకు శాంతి చేకూరాలని మనమంతా ప్రార్థిద్దాం.